Moliyaviy madaniyatni shakllantirish, "kibergigiyena"ga o‘rgatish va mikromoliya xizmatlarini ommalashtirish – moliyaviy savodxonlikni yaxshilashning muhim yo‘nalishlari
Markaziy bankning hududiy bosh boshqarmalarining salohiyatli xodimlari tomonidan respublikamizning chekka tumanlarida aholining moliyaviy savodxonligini oshirishga qaratilgan o‘quv-tadbirlari o‘tkazilmoqda.
Xususan, may oyi davomida hududlarda o‘tkazilgan o‘quv mashg‘ulotlarida 540 nafardan ziyod yoshlar, 350 nafardan ortiq xotin-qizlar, 30 nafarga yaqin migrant va ularning oila a’zolari hamda 200 nafardan ziyod mahalla faollari ishtirok etishdi.
Kun tartibida aholini tadbirkorlikka jalb qilish, jumladan, o‘zini-o‘zi band qilishda yaratilgan mikromoliyaviy xizmatlarning imkoniyatlari, imtiyozli kreditlash dasturlari, ijobiy kredit tarixini shakllantirishda mas’uliyatli qarz olishning ahamiyati bilan birgalikda aholida “kibergigiyena”ni shakllantirish, raqamli moliyaviy savodxonligini oshirish mavzulariga alohida e’tibor qaratildi.
