Joriy yilda ikkinchi marotaba Markaziy bankning hududiy bosh boshqarmalari salohiyatli xodimlari uchun moliyaviy savodxonlik va ommaboplik yo‘nalishida malaka oshirishga doir amaliy trening mashg‘ulotlari o‘tkazildi.
Ushbu amaliy trening hududlarda faoliyat yuritayotgan salohiyatli xodimlarning moliyaviy bilimlarini oshirishga hamda ular orqali chekka tuman (shahar)larda aholi va tadbirkorlik sub’yektlarining moliyaviy savodxonligini va bank xizmatlaridan foydalanish imkoniyatini yanada kengaytirish ishlarini tizimli ravishda davom ettirishga xizmat qiladi.
Seminar davomida quyidagi dolzarb mavzular qamrab olindi:- aholini biznesga jalb qilish va tadbirkorlik faoliyatini boshlashning muhim jihatlari;
- tadbirkorlar uchun faktoring xizmatlarining jozibadorligi;
- mikromoliya tashkilotlari tomonidan islomiy moliyalashtirishga oid xizmatlarni ko‘rsatish tartibi;
- moliyaviy xavfsizlik, bank kartalari bilan bog‘liq firibgarliklarning oldini olish bo‘yicha amalga oshirilayotgan ishlar;
- ustuvor maqsadli guruhlar uchun o‘quv tadbirlari tashkil etishning yangi shakllari hamda dolzarb yo‘nalishlari.
Markaziy bank hududiy bosh boshqarmalari vakillari tomonidan moliyaviy savodxonlik bo‘yicha joriy yilda amalga oshirilgan ishlar va 2025 yilga mo‘ljallangan loyihalar yuzasidan ma’lumot berildi hamda o‘zaro muhokamalar asosida fikr almashildi.