Respublikamizning chekka tumanlarida aholining kiberjinoyatlar qurboniga aylanishining oldini olish, banklarga bo‘lgan ishonchini hamda raqamli moliyaviy savodxonligini oshirish bo‘yicha tizimli ishlar davom ettirilmoqda.
Markaziy bank tomonidan navbatdagi o‘quv-trening tadbirlari Andijon, Namangan va Farg‘ona viloyatlarida bo‘lib o‘tdi.
Andijon viloyatining Jalaquduq, Izboskan, Marhamat, Paxtaobod, Bo‘ston, Ulug‘nor va Farg‘ona viloyatining Furqat, Farg‘ona, Yozyovon hamda Namangan viloyatining Norin, Mingbuloq tumanlarida o‘tkazilgan o‘quv mashg‘ulotlarida 595 nafar yoshlar, 505 nafar xotin-qizlar, 58 nafar tadbirkor, 54 nafar "Inson" ijtimoiy xizmatlari markazi xodimlari hamda 169 nafar mahalla faollari ishtirok etishdi.
Treninglar davomida Markaziy bank va tijorat banklari mutaxassislari tomonidan aholini tadbirkorlikka jalb qilish, jumladan, o‘zini-o‘zi band qilishda yaratilgan mikromoliyaviy xizmatlarning imkoniyatlari, imtiyozli kreditlash dasturlari, ijobiy kredit tarixini shakllantirishda mas’uliyatli qarz olishning ahamiyati, iste’molchilar huquqlarini himoya qilish shuningdek, moliyaviy xavfsizlikning asosiy qoidalari kabi mavzularga alohida e’tibor qaratildi
