Yordamchi-agent – mahalladagi har bir xonadonni yaxshi biladigan, aholi orasida bank xizmatlarini ommalashtirish, moliyaviy savodxonlikni oshirish, aholi va tadbirkorlik sub'ektlarini bank xizmatlariga qiziqtirish orqali tadbirkorlik faoliyatini boshlash va kengaytirish bo‘yicha mahalla bankiriga ko‘maklashuvchi jismoniy shaxsdir.
O‘zbekiston Respublikasi Prezidenti Sh.M.Mirziyoev rahbarligida 2024 yil 16 dekabr' kuni banklar tomonidan mahallalarda aholi bandligini ta'minlash va daromadli qilish bo‘yicha 2025 yilda amalga oshiriladigan ishlar yuzasidan o‘tkazilgan yig‘ilishida maxallalarda yordamchi-agentlar faoliyati tizimi joriy etildi. Ushbu faoliyatni joriy qilishdan asosiy maqsad hududlarda bank xizmatlari ommabopligini oshirish bilan birga aholining moliyaviy farovonligini yaxshilashdan iborat.
Yordamchi-agentlar aholini bank xizmatlariga qiziqtirish va biznes loyiha takliflarini topish ishlariga mahalla bankirlariga yaqindan ko‘maklashadilar hamda Markaziy bankning moliyaviy ommaboplikni rivojlantirish dasturlarini amalga oshirishga jalb qilinadilar.
Agentlar faqat o‘z xizmat vazifalari doirasida harakat qilishlari lozim.
Yordamchi-agentlarni tanlash mexanizmi
Tijorat banklari mahalla bankiriga ko‘maklashuvchi yordamchi-agentlarni mahalla raisi tavsiyasi bilan o‘zlariga biriktirilgan mahallalarda xonadonlarni yaxshi biladigan aholi orasidan yollaydilar. Yordamchi-agentni shartnoma asosida yollashda quyidagi mezonlar e'tiborga olinishi tavsiya etiladi:
- mahallada hurmat, yaxshi obro‘-e'tiborga ega;
- salomatligi yaxshi;
- sudlanmagan va diniy jamoalarga jalb qilinmagan;
- o‘z g‘oyalarini ilgari surishda faol;
- g‘ayratli va natija ko‘rsatishda harakatchan;
- kirishuvchanlik va kuchli kommunikasiya ko‘nikmalariga ega;
- raqamli aloqa vositalari (telefon, planshet, komp'yuter) bilan ishlash ko‘nikmalariga ega bo‘lgan erkak va ayollar.
