Bank omonatlari nafaqat pulni tejash, balki jamg‘armalarni ko‘paytirishning ham ishonchli usulidir. Deylik, siz bankka ma'lum miqdordagi pulni topshirasiz, bank esa sizga mablag‘lar saqlangan muddati uchun foizlar to‘laydi
Boshqacha aytganda, siz pul ishlab topasiz va siz ishlab topgan pullar siz uchun ishlashni boshlaydi
Bugungi kunda siz bankka borib (“oflayn” tarzda) o‘zingizga omonat hisobvarag‘ini ochishingiz mumkin yoki bank kartasi va bank ilovasi yordamida (“onlayn” tarzda) bankka omonat qo‘yish imkoniyatiga ham egasiz
Onlayn-omonatlarning foizlari ham oddiy omonatlar foizlari kabi hisoblanadi hamda pul bank kartasiga yoki mobil ilovadagi elektron hamyonga o‘tkaziladi. Foizlarni hisob-kitob qilish uchun Depozit kal'kulyatoridan foydalanish lozim
Bugungi kunda tijorat banklari omonatlar yuzasidan mijozlarga rang-barang takliflarni taqdim etmoqda. Takliflarni o‘rganish va omonatlarni tanlash jarayonida dastlab quyidagi uch jihatga e'tibor qarating:
Foizlar chegarasi
Banklarda 14% dan 24% gacha bo‘lgan omonat turlari mavjud. Tabiiyki, xizmat yuzasidan belgilangan shartlar ma'lum tafovutlarni yuzaga keltirgan. Ya'ni, bir bankdagi omonatlar turiga qarab turli foizda bo‘lishi mumkin. Mijozlarga bevosita omonat shartnomalari bilan to‘liq tanishib chiqish tavsiya etiladi
Miqdor chegarasi
Tijorat banklari omonat ochishdagi eng kam pul miqdorini belgilashda mustaqildirlar. Masalan, “ALOQABANK”da 0 so‘m, 1000 so‘m, 50 000 so‘m, “ANOR BANK” va “Mikrokreditbank” da 100 000 so‘m minimal summadagi omonat turlari mavjud bo‘lsa, “ASIA ALLIANCE BANK”da minimal summasi 5 mln so‘m bo‘lgan omonat turiga ham duch kelish mumkin
Muddat chegarasi
Tijorat banklarida foizlar va miqdor singari omonat muddatlari ham bir-biridan farqlanishi mumkin. Masalan, “GARANT BANK”, “ASAKABANK”, “IPAK YULI BANK”da 3 oylik muddatdagi omonatlar mavjud. Aksariyat banklardagi omonat turlari 6-12 oydagi muddat uchun mo‘ljallangan
