Жорий йил 4 май куни Марказий банк томонидан “OSON”, “CLICK”, “Payme” компаниялари, шунингдек “Humo” тўлов тизими билан биргаликда “Korzinka”, “Makro”, “Redtag”, “Indenim” чакана савдо компаниялари ходимлари учун рақамли молиявий саводхонлик бўйича ўқув-амалий тренинг ўтказилди.
Ушбу тадбирдан асосий мақсад – контактсиз тўловларнинг ишлаш тамойиллари тўғрисида батафсил маълумот бериш орқали ходимлар молиявий саводхонлигини ошириш ҳамда хизмат кўрсатиш соҳасида молиявий маданиятни шакллантиришдан иборат.
Тренинг жараёнида тўлов ташкилотлари экспертлари томонидан бизнес-қарорларнинг функционал имкониятлари ҳамда рақамли молиявий маҳсулот ва хизматлар моҳияти батафсил ёритиб берилди. Тўлов жараёнидаги хатоликлар ва мижозга пулларини қайтариш тартибига алоҳида эътибор қаратилди ва бевосита контактсиз тўловларни амалга оширишда мижозларнинг молиявий хавфсизлигини таъминлаш бўйича амалий кўрсатмалар берилди.
Тадбир интерактив шаклда олиб борилди – иштирокчилар ўзларини қизиқтирган саволларга жавоб олишди ҳамда рақамли молиявий технологияларни янада ривожлантириш бўйича ўз таклиф-мулоҳазаларини билдиришди.
Қуйида тренинг маърузачиларининг тақдимотлари келтирилган:
- Халқаро банк карталари орқали тўловлар – Oson компанияси - презентацияни юклаб олиш
- CLICK PASSдан фойдаланиш: Харидор ва сотувчилар учун афзалликлар – Click компанияси - презентацияни юклаб олиш
- QR-тўлов – Payme компанияси - презентацияни юклаб олиш
- Контактсиз тўловлар тартиби - «Humo» МБПМ - презентацияни юклаб олиш
