Ёрдамчи-агент – маҳалладаги ҳар бир хонадонни яхши биладиган, аҳоли орасида банк хизматларини оммалаштириш, молиявий саводхонликни ошириш, аҳоли ва тадбиркорлик субъектларини банк хизматларига қизиқтириш орқали тадбиркорлик фаолиятини бошлаш ва кенгайтириш бўйича маҳалла банкирига кўмаклашувчи жисмоний шахсдир.
Ўзбекистон Республикаси Президенти Ш.М.Мирзиёев раҳбарлигида 2024 йил 16 декабрь куни банклар томонидан маҳаллаларда аҳоли бандлигини таъминлаш ва даромадли қилиш бўйича 2025 йилда амалга ошириладиган ишлар юзасидан ўтказилган йиғилишида махаллаларда ёрдамчи-агентлар фаолияти тизими жорий этилди. Ушбу фаолиятни жорий қилишдан асосий мақсад ҳудудларда банк хизматлари оммабоплигини ошириш билан бирга аҳолининг молиявий фаровонлигини яхшилашдан иборат.
Ёрдамчи-агентлар аҳолини банк хизматларига қизиқтириш ва бизнес лойиҳа таклифларини топиш ишларига маҳалла банкирларига яқиндан кўмаклашадилар ҳамда Марказий банкнинг молиявий оммабопликни ривожлантириш дастурларини амалга оширишга жалб қилинадилар.
Агентлар фақат ўз хизмат вазифалари доирасида ҳаракат қилишлари лозим.
Ёрдамчи-агентларни танлаш механизми
Тижорат банклари маҳалла банкирига кўмаклашувчи ёрдамчи-агентларни маҳалла раиси тавсияси билан ўзларига бириктирилган маҳаллаларда хонадонларни яхши биладиган аҳоли орасидан ёллайдилар. Ёрдамчи-агентни шартнома асосида ёллашда қуйидаги мезонлар эътиборга олиниши тавсия этилади:
- маҳаллада ҳурмат, яхши обрў-эътиборга эга;
- саломатлиги яхши;
- судланмаган ва диний жамоаларга жалб қилинмаган;
- ўз ғояларини илгари суришда фаол;
- ғайратли ва натижа кўрсатишда ҳаракатчан;
- киришувчанлик ва кучли коммуникация кўникмаларига эга;
- рақамли алоқа воситалари (телефон, планшет, компьютер) билан ишлаш кўникмаларига эга бўлган эркак ва аёллар.
