Кобренд банк карталари – бу товарлар сотувчи ёки хизмат кўрсатувчи ташкилот ва банкларнинг қўшма маҳсулоти. Ўз номи билан “кобрендинг” атамаси инглиз тилидан “бирлашган савдо белгилари” деб таржима қилинади.
Кобренд банк карталарини маркетологлар томонидан ишлаб чиқилган маҳсулот деса ҳам бўлади. Одатда, бундай банк картаси чиқарилганда унга ташкилотнинг ўз расмий ранги ва белгиси туширилади.
Кобренд картаси бир вақтнинг ўзида бир нечта имтиёзларга эга бўлиш имконини беради: бундай банк картасининг эгаси ўз пулини одатдагидек сарфлайди ва бунинг эвазига маълум бонуслар, чегирмалар ёки кешбэклар олади. Кобрендинг банк картаси ҳам оддий банк картаси каби бир хил вазифаларни бажаради. Ушбу картадан тўловларни амалга оширишингиз, нақд пул ечишингиз ва уни тўлдиришингиз мумкин.
Кобрендинг картаси ҳам миллий, ҳам халқаро бўлиши мумкин. Бонуслар ва кешбэклар ҳисоб рақамга ўтказиш йўли билан ёки картадан фойдаланишнинг махсус шартларига мос равишда қайтарилиши мумкин.
Бугунги кунда Ўзбекистонда банк кобренд карталари тўлов ва сайёҳлик ташкилотлари билан биргаликда фаолият кўрсатмоқда. Улардан фойдаланиб сиз шерик дўконлардан маълум хизматлар/маҳсулотлар учун чегирмалар ёки махсус таклифларга эга бўлишингиз, авиақатновлар учун хизмат кўрсатиш сифатини оширишингиз, авиамилларни тўплашингиз ёки мижознинг содиқлик дастури қоидаларига мувофиқ уларни авиачипталарга алмаштиришингиз мумкин.[1]
Кобрендинг картасини танлашда нималарга эътибор қаратиш керак?
- Картани чиқариш, алмаштириш/ қайта чиқариш нархига – кобренд карталарини чиқариш хизматлари стандарт карталарни чиқаришдан қимматроқ бўлиши мумкин;
- тарифлар ва комиссияларга;
- бонуслар/кешбэклар олиш шартларига.
Агар кобренд карта халқаро бўлса, унда дастлабки тўловга ва минимал баланс миқдорига эътибор беришингиз керак.
Кобрендинг картасини қандай олиш мумкин?
Бугунги кунда банклар томонидан кобренд карталарнинг ҳар хил турлари таклиф қилинмоқда. Сиз картага буюртмани онлайн тарзда ёки энг яқин банк филиалига ташриф буюрган ҳолда амалга оширишингиз мумкин.
[1] Банклар томонилан кобренд карталар учун тақдим қилинадиган бонуслар бир биридан фарқланиши мумкин. Карта очишдан олдин мижознинг содиқлик дастури билан танишиб чиқинг.
